کیا روکے قضا کے وار تعویذ

کیا روکے قضا کے وار تعویذ

قلعہ ہے نہ کچھ حصار تعویذ

چونی میں ہے مشک بار تعویذ

یا فتنۂ روزگار تعویذ

دونوں نے نہ درد دل مٹایا

گنڈے کا ہے رشتے دار تعویذ

کیا ناد علی میں بھی اثر ہے

چاروں ٹکڑے ہیں چار تعویذ

ڈرتا ہوں نہ صبح ہو شب وصل

ہے مہر وہ زرنگار تعویذ

ہم کو بھی ہو کچھ امیدِ تسکیں

کھوئے جو تپ خیار تعویذ

پتال کو جڑہماری پہنچی

گاڑا تہ پائے یار تعویذ

حاجت نہیں ان کو نورتن کی

بازو پہ ہیں پانچ چار تعویذ

کھٹکے، وہ نہ آئے فاتحے کو

دیکھا جو سر مزار تعویذ

پی جائیں گے گھول کر کسے آپ

ہے نقش نہ خاک سار تعویذ

اے ترک ملیں بلائیں سر سے

اک تیغ کا خطر، ہزار تعویذ

ڈر ہے تمہیں کٹکیوں سے لازم

لایا تو ہے سادہ کار تعویذ

اکسیر کا نسخہ اس کو سمجھوں

کھوئے جو ترا غبار تعویذ

مجمع ہے امیرؔ کی لحد پر

میلے کا ہے اشتہاد تعویذ