chamkae hain kya dagh-e-jigar aah-e-rasa ne

chamkā.e haiñ kyā dāġh-e-jigar āh-e-rasā ne

un phūloñ meñ aur aag lagā dī hai sabā ne

jaa.e tapish-e-dil muri kis kis ko bulāne

muñh terī tarah mujh se chhupāyā hai qazā ne

parda ruḳh-e-mahbūb se ulTā hai huā ne

ye phuul khilāyā hai nayā bād-e-sabā ne

yaañ haath uThāyā hai du'ā ke liye maiñ ne

tāsīr se vaañ haath uThāyā hai du'ā ne

bulbul jo huī zab.h to ġhunche ye pukāre

chhoḌā hai shagūfa ye nayā bād-e-sabā ne

lo vasl meñ betābī-e-dil ho ga.ī duunī

kī aur kumak dard-e-mohabbat kī davā ne

kis kis ke chale joḌ shab-e-vasl meñ mujh par

chakme diye shoḳhī ne to kī chaal hayā ne

dil pis ke 'amīr' un ke qadam tak bhī na pahuñchā

aur bose liye hāthoñ ke bhī pis ke hinā ne

chamkae hain kya dagh-e-jigar aah-e-rasa ne

un phulon mein aur aag laga di hai saba ne

jae tapish-e-dil muri kis kis ko bulane

munh teri tarah mujh se chhupaya hai qaza ne

parda ruKH-e-mahbub se ulTa hai hua ne

ye phul khilaya hai naya baad-e-saba ne

yan hath uThaya hai du'a ke liye main ne

tasir se wan hath uThaya hai du'a ne

bulbul jo hui zabh to ghunche ye pukare

chhoDa hai shagufa ye naya baad-e-saba ne

lo wasl mein betabi-e-dil ho gai duni

ki aur kumak dard-e-mohabbat ki dawa ne

kis kis ke chale joD shab-e-wasl mein mujh par

chakme diye shoKHi ne to ki chaal haya ne

dil pis ke 'amir' un ke qadam tak bhi na pahuncha

aur bose liye hathon ke bhi pis ke hina ne