یہ جلووں کی مستی یہ الفت کی بادہ نظر سے پلانے کی کوشش نہ کرنا

یہ جلووں کی مستی یہ الفت کی بادہ نظر سے پلانے کی کوشش نہ کرنا

ہمیں ان اداؤں سے بے خود بنا کر شرابی بنانے کی کوشش نہ کرنا

یہ رسم چمن ہے جو کل ہنس رہے تھے وہ پھول آج مرجھا گئے ہیں چمن میں

کوئی جا کے معصوم کلیوں سے کہہ دے یہاں مسکرانے کی کوشش نہ کرنا

مبارک ہوں تم کو یہ دل کش نظارے تمہارے مقدر میں ہیں چاند تارے

مری زندگی میں ہیں آنسو ہی آنسو مرے پاس آنے کی کوشش نہ کرنا

تمہیں اپنی قسمت سے جب ہم نے مانگا تو کانوں میں یہ صاف آواز آئی

مقدر کی تحریر مٹتی نہیں ہے نصیب آزمانے کی کوشش نہ کرنا

محبت کے آنسو ہیں موتی کی لڑیاں مبارک ہوں تجھ کو جدائی کی گھڑیاں

خبردار اس غم سے گھبرا کے انورؔ اسے بھول جانے کی کوشش نہ کرنا