تو جوگی بن نہ بروگی بن نہ لگا کے خاک تو بن میں جا

تو جوگی بن نہ بروگی بن نہ لگا کے خاک تو بن میں جا

تجھے اس کی شان ہے دیکھنی کسی معرفت کے چمن میں جا

جو خودی کو اپنے مٹائے گا تو خدا کی ذات کو پائے گا

تجھے اس کا نور ہے دیکھنا تو مثال چاند گہن میں جا

وہی رام میں وہ رحیم میں وہی الف لام اور میم میں

وہی کہہ کے کن کہیں چھپ گیا اسے ڈھونڈھ اپنے ہی بن میں جا

وہی بدر میں وہ ہلال میں وہی رخ میں گیسو میں خال میں

مجھے اس کا کچھ بھی پتہ نہیں اسے دیکھ چاہ ذقن میں جا

تو عبث مٹاتا ہے رنگ و بو تجھے کون جانے ہے کون تو

کہا مان اصغرؔ بے نوا تو یہاں سے اپنے وطن میں جا