کیا رب سے اور مانگوں میں اس کے ملن کے بعد

کیا رب سے اور مانگوں میں اس کے ملن کے بعد

اللہ خود ملا ہے مجھے جس سجن کے بعد

جچتا ہی کچھ نہیں ہے اب اس پیرہن کے بعد

اترن کی تیری ایسی نرالی پھبن کے بعد

وہ پیر اور ہوں گے جو ڈھونڈیں مرید کو

جان مسیح ملتے ہیں لاکھوں جتن کے بعد

سب تلخیاں زمانے کی دل بھولنے لگا

تیر نگاہ یار کی میٹھی چبھن کے بعد

کوئی تو خاص بات ہے اس بزم ناز میں

ٹھہرا نہ دل کہیں بھی تری انجمن کے بعد

میں تم کو چھوڑ دوں گا تو سب چھوٹ جائیں گے

سب کی لگن لگی ہے تمہاری لگن کے بعد

ماجدؔ کے جتنے شعر ہیں نشتر کی دین ہیں

یہ راز ہم نے جانا ہے مشق سخن کے بعد