meri fana mein gar hai baqa phir kisi ko kya

merī fanā meñ gar hai baqā phir kisī ko kyā

parde ko maiñ rakkhā na rakkhā phir kisī ko kyā

pā lūñgā apne aap sazā phir kisī ko kyā

kahtā huuñ jo lafz-e-anā phir kisī ko kyā

ye baat ho ravā na ravā phir kisī ko kyā

vā'iz sikhā na qā.ede mujh ko sujūd ke

parvāz merī dekh to bāhar hudūd ke

jazbāt bahr-o-bar meñ haiñ merī numūd ke

ye ḳhair-o-shar sifāt mirī hī vujūd ke

bāhar burā huuñ yā ki bhalā phir kisī ko kyā

shīrīñ-dahan ke saaz se naġhme sunā to maiñ

behosh rah ke hosh kī bāteñ kiyā to maiñ

saaqī ke paa.e naaz pe sajde kiyā to maiñ

luqma harām khā ke bhī sālik rahā to maiñ

kāfir banā to aap banā phir kisī ko kyā

'hamdam' hai rind garche nahīñ muttaqī ’ubaid

ai shaiḳh-e-shar’a tum ko ravā panditoñ ko diid

tum jānte nahīñ ho agar surḳh aur safed

kyuuñ pūchhte ho ’āshiq-e-ḳhvāja muiiñ se bhed

us ne kahā kahā na kahā phir kisī ko kyā

meri fana mein gar hai baqa phir kisi ko kya

parde ko main rakkha na rakkha phir kisi ko kya

pa lunga apne aap saza phir kisi ko kya

kahta hun jo lafz-e-ana phir kisi ko kya

ye baat ho rawa na rawa phir kisi ko kya

wa'iz sikha na qaede mujh ko sujud ke

parwaz meri dekh to bahar hudud ke

jazbaat bahr-o-bar mein hain meri numud ke

ye KHair-o-shar sifat meri hi wujud ke

bahar bura hun ya ki bhala phir kisi ko kya

shirin-dahan ke saz se naghme suna to main

behosh rah ke hosh ki baaten kiya to main

saqi ke pae naz pe sajde kiya to main

luqma haram kha ke bhi salik raha to main

kafir bana to aap bana phir kisi ko kya

'hamdam' hai rind garche nahin muttaqi ’ubaid

ai shaiKH-e-shar’a tum ko rawa panditon ko did

tum jaante nahin ho agar surKH aur safed

kyun puchhte ho ’ashiq-e-KHwaja muin se bhed

us ne kaha kaha na kaha phir kisi ko kya