مدت سے چٹیلا تھا پڑا دل پہ اثر آج

مدت سے چٹیلا تھا پڑا دل پہ اثر آج

رہ رہ کے جو اٹھتا ہے مرا دردِ جگر آج

بن ٹھن کے وہ بیٹھیں گے سر شام سے کہہ دو

دکھلائیں خجالت سے نہ منہ شمس و قمر آج

سنتے ہیں کہ آئیں گے وہ شمشیرِ برہنہ

عشاق سے کہہ دو کہ رہیں سینہ سپر آج

کل کی ہے خبر کس کو رہے یا نہ رہے دم

کرنا ہو جو کل کام وہی لے کر لے بشر آج

کل کی ہے خبر کس کو الٰہی یہ دعا ہے

پھلتا رہے دنیا میں مرادوں کا شجر آج

افلاک پہ دہشت سے سہم جائیں فرشتے

دکھلائے جو نالہ مرا کچھ اپنا اثر آج

دل زخموں سے ہے چور سب ارمان بھرے ہیں

پایا ہے یہ دنیا میں محبت کا ثمر آج

ستار ترا نام ہے سب عیب چھپا لے

اوروں کے یہ کہتے ہیں مرے دیدۂ تر آج

ہم ڈھونڈھنے نکلے ہیں کوئی یار وفادار

جائیں گے مقدر ہمیں لے جائے جدھر آج

دکھلا کے وہ جوبن ہمیں کس ناز سے بولے

گدرائے جوانی میں محبت کے ثمر آج

گردش میں فلک سے بھی سوا رہتے ہیں مفلس

آرام سے وہ ہی ہیں جو ہیں صاحبِ زر آج

ساقی ہے نہ ساغر ہے مرے جاتے ہیں بے موت

تقدیر سے مے خانے کا بھی بند ہے در آج

پائیں گے بھلا خاک تری چشم کو آہو

چیتے بھی خجالت سے چھپاتے ہیں کمر آج

بادل نظر آنے لگے سب روئی کے گالے

دکھلائے تماشا مرے آہوں کا اثر آج

نیند آئی جو تکیے کو سرہانے سے ہٹایا

زانو پہ مرے سویا کئے دو دوپہر آج

بوسہ جو لیا پیار سے شرما کے وہ بولے

لگ جائے تمہاری نہ کہیں مجھ کو نظر آج

گھر گھر دمِ آخر مرے کہرام مچے گا

احباب کہیں گے کہ وہ کرتے ہیں سفر آج

بوسہ جو لیا یار کو پہلو میں بٹھا کے

اغیار تو کھا کھا کے رہے خونِ جگر آج

اے بدرؔ نظر بازاروں میں ہے نام تمہارا

جاتی ہے بہت دور تمہاری بھی نظر آج