ہر شئے کو مرے دل سے بھلاتے ہوئے آتے

ہر شئے کو مرے دل سے بھلاتے ہوئے آتے

آنا تھا تو بے ہوش بناتے ہوئے آتے

مدہوشیوں کو ہوش میں لاتے ہوئے آتے

آتے مری دنیا کو جگاتے ہوئے آتے

ہر ذرے کو اک طور بناتے ہوئے آتے

یہ ہو نہ سکا جلوے لٹاتے ہوئے آتے

اشکوں پہ گراتے مرے تم برق تبسم

پانی میں ذرا آگ لگاتے ہوئے آتے

دنیا کو تو اک آن میں بے ہوش کیا تھا

مجھ کو بھی ہر اک چیز بھلاتے ہوئے آتے

خود داری الفت بھی کوئی چیز تھی بہزادؔ

ہر گام پہ کیوں سر کو جھکاتے ہوئے آتے