تم سے نظر کے سامنے آیا نہ جا سکا

تم سے نظر کے سامنے آیا نہ جا سکا

شاید نظر کا بار اٹھایا نہ جا سکا

ہم سے ترا تصور رنگیں ترا خیال

کیں لاکھوں کوششیں پہ بھلایا نہ جا سکا

بزم تجلیات کی وارفتگی نہ پوچھ

یہ ہوش تھا کہ ہوش میں آیا نہ جا سکا

تھیں جلوہ گر جو آپ کی اس میں تجلیات

دل عشق کی نظر سے گرایا نہ جا سکا

ناکام ہو گئی مری چشم پر آب بھی

شعلہ بھڑک گیا تو بجھایا نہ جا سکا

ان کی عطا کی خیر ہو بہزادؔ مبتلا

وہ کی عطا کہ جس کو بھلایا نہ جا سکا