بارک اللہ آپ نے کار نمایاں کر دیا

بارک اللہ آپ نے کار نمایاں کر دیا

اک نظر میں بے نیاز کفر و ایماں کر دیا

کس نے پھر بے چین یہ ساز رگ جاں کر دیا

روح کو مضطر کیا دل کو پریشاں کر دیا

دیکھیے کیا ہو مرے اشک مسلسل بار بار

دل تھا اک قطرہ مگر اس غم نے طوفاں کر دیا

اے جبین شوق تیری قوتوں کے میں نثار

ایک سجدے سے قیام بزم امکاں کر دیا

اے تصور کیا سکون دل تھا تجھ کو ناگوار

تو نے ان کو سامنے لا کر خراماں کر دیا

ایک لمحے میں کیا طے جادۂ عشق و وفا

میرے پائے شوق نے منزل کو حیراں کر دیا

اس نگاہ ناز نے بہزادؔ جنبش کے ساتھ

زندگی بخش دی جینے کا ساماں کر دیا