جہان شوق کی دنیا پریشاں ہے جہاں میں ہوں

جہان شوق کی دنیا پریشاں ہے جہاں میں ہوں

ہر اک جانب مرا جلوہ نمایاں ہے جہاں میں ہوں

ہوا تو کیا فضا بھی گل بداماں ہے جہاں میں ہوں

خدا شاہد ہے اک بزم حسیناں ہے جہاں میں ہوں

جہان حسن بھی الفت بداماں ہے جہاں میں ہوں

محبت کی قسم عشق فراواں ہے جہاں میں ہوں

تعجب تو یہ ہے پہلو بہ پہلو عشق و الفت کے

جمال نو بھی مستی سے خراماں ہے جہاں میں ہوں

چلو چل کر مرے ہم راہ دیکھو وہ نئی دنیا

گلستاں ہاں گلستاں ہی گلستاں ہے جہاں میں ہوں

چلو بہزادؔ کچھ دن کو جو لطف زندگی چاہو

کہ لطف زندگی جینے کا ساماں ہے جہاں میں ہوں