ایسا نہ ہو کہ کم یہ مرا اضطراب ہو

ایسا نہ ہو کہ کم یہ مرا اضطراب ہو

دل کامیاب ہو نہ نظر کامیاب ہو

مارا ہوا جو ہوں میں جہان خراب کا

شرمندہ مجھ سے کیوں نہ جہان خراب ہو

میں بھی ہوں سامنے مرا دل بھی ہے سامنے

اب دیکھنا ہے میں ہوں کہ دل انتخاب ہو

اس سمت ہے نظر تو ادھر دل ہے دیکھیے

دل کامیاب ہو کہ نظر کامیاب ہو

مل جائے ذوق عشق کو معراج زندگی

ان کے حضور میں جو نظر کامیاب ہو

دنیا سے حسن و عشق میں ایسا کرے خدا

میرا جواب ہو نہ تمہارا جواب ہو

دیکھا ہے کامیاب محبت جو خواب عشق

اللہ کامیاب ہی تعبیر خواب ہو

اک جان اور سکون کے دشمن ہزار میں

بہزادؔ مبتلا کو نہ کیوں اضطراب ہو