منزل کی جستجو تھی پہ منزل نہ مل سکی

منزل کی جستجو تھی پہ منزل نہ مل سکی

ہم کو کسی طرح تری محفل نہ مل سکی

ہم نے ہر ایک گام کو منزل بنا لیا

آسانیاں تو مل گئیں مشکل نہ مل سکی

غم بھی مسرتوں کی طرح سے ہے عارضی

مایوس غم کو لذت کامل نہ مل سکی

دیکھیں ہزار چشم تمنا نے محفلیں

جس کی تلاش تھی وہی محفل نہ مل سکی

رہرو بھی میرے ساتھ ہی گم گشتہ ہو گئے

اک بار مل کے پھر کبھی منزل نہ مل سکی

جب سے ہوا ہے دست طلب غم سے بے نیاز

دست گدا کو لذت سائل نہ مل سکی

اک بار آکے پھر کبھی طوفاں نہ آ سکا

کشتئ دل کو دورئ ساحل نہ مل سکی

بہزادؔ اس کی زیست کوئی زیست ہی نہیں

جس کو عطائے مرشد کامل نہ مل سکی