خدا را نہ سنئے کہ کیا کہہ رہا ہوں

خدا را نہ سنئے کہ کیا کہہ رہا ہوں

میں حال دل مبتلا کہہ رہا ہوں

نہ حسرت نہ میں مدعا کہہ رہا ہوں

اسے تم سمجھ لو کہ کیا کہہ رہا ہوں

ہے ہر موج مجھ کو ڈبونے کی کوشاں

میں ہر موج کو ناخدا کہہ رہا ہوں

خدا جانے اب اور آگے کہوں کیا

ابھی تک وفا کو وفا کہہ رہا ہوں

بھلا اور کیا ہوگی معراج الفت

تری ہر جفا کو وفا کہہ رہا ہوں

سنبھالو سنبھالو مرا دین و ایماں

کہ میں بے خودی کو خدا کہہ رہا ہوں

مرا قصۂ غم عمومی نہیں ہے

زمانے سے بالکل جدا کہہ رہا ہوں

محبت میں ڈوبا ہے ہر لفظ میرا

یہ تم جانتے ہو کہ کیا کہہ رہا ہوں

وفا ان سے بہزادؔ کی تو ہے لیکن

میں اس کو بھی اپنی خطا کہہ رہا ہوں