روشن جہاں ہے جس سے وہ محفل تمہیں تو ہو

روشن جہاں ہے جس سے وہ محفل تمہیں تو ہو

دل جس کو ڈھونڈھتا ہے وہ منزل تمہیں تو ہو

کہتا ہوں اپنا دل جسے وہ دل تمہیں تو ہو

میرے جہان عشق کا حاصل تمہیں تو ہو

جو موج کی ہے آس جو کشتی کا آسرا

دریائے درد و غم کا وہ ساحل تمہیں تو ہو

مشکل نہیں ذرا بھی وہ آسان شے ہوں میں

حل جس کا کچھ نہیں ہے وہ مشکل تمہیں تو ہو

اس راہ غم میں اور بھٹکنے تو دو مجھے

وہ کا کام کیا ہے کہ منزل تمہیں تو ہو

مشکل تو کچھ نہیں مری عقدہ کشائیاں

مشکل یہ آ پڑی ہے کہ مشکل تمہیں تو ہو

دیکھو اداس ہونے نہ پائے یہ بزم عشق

یہ بھی خبر ہے صاحب محفل تمہیں تو ہو

ان کو سنا رہا ہوں غم دل کی داستاں

کیا یہ بھی کھول دوں کہ غم دل تمہیں تو ہو

حسرت سے دیکھتے ہو سجود وفا مگر

بہزادؔ مبتلا کے مقابل تمہیں تو ہو