دل کی خلش کا دردِ محبت کا واسطہ

دل کی خلش کا درد محبت کا واسطہ

دیکھو ادھر بھی چشم مروت کا واسطہ

روداد غم کے سننے کی کوشش کرو نہ تم

افسانہ ہائے درد محبت کا واسطہ

جلووں کو کھیلنے دو نظر سے مری ذرا

تم کو نگاہ عشق کی جرأت کا واسطہ

کیوں بے نقاب کرتے ہو یہ روئے تابناک

نظارہ جمال حقیقت کا واسطہ

للہ اس طرف بھی وہی چشم دل نواز

میں دے رہا ہوں لفظ محبت کا واسطہ

باقی رہے نہ جیب و گریباں میں ایک تار

دست جنوں تجھے مری وحشت کا واسطہ

اے کردگار بخش دے بہزادؔ کے گناہ

دیتا ہے وہ تجھے تری رحمت کا واسطہ