ادا کی لے رہی ہے عرش کی پہلو نشیں ہو کر

ادا کی لے رہی ہے عرش کی پہلو نشیں ہو کر

زمیں روضہ کی تیرے تیرے روضہ کی زمیں ہو کر

رہا جو مدتوں تاج سر عرش بریں ہو کر

وہی چمکا عرب میں نور رب العالمیں ہو کر

محمدؐ سر سے پا تک مظہر حسن الٰہی ہیں

کہ آئے دہر میں تصویر صورت آفریں ہو کر

کریں تزئین مہ رویان عالم کو ضرورت ہے

تمہیں کیا چاہیے محبوب رب العالمیں ہو کر

محمدؐ سب سے پہلے ہم گنہ گاروں کو پوچھیں گے

ہمیں وہ بھول سکتے ہیں شفیع المذنبیں ہو کر

ہمارا کچھ نہ ہونا لاکھ ہونے کے برابر ہے

چلے دنیا سے ہم شیدائے ختم المرسلیں ہو کر

ہمارے سر پہ بیدمؔ ظل دامان محمدؐ ہے

تو کیا کر لے گا پھر خورشید محشر خشمگیں ہو کر