تڑپتا لوٹتا اڑتا جو بے تابانہ آتا ہے

تڑپتا لوٹتا اڑتا جو بے تابانہ آتا ہے

یہ مرغ نامہ بر آتا ہے یا پروانہ آتا ہے

رخ روشن کے آگے شمع رکھ کر وہ یہ کہتے ہیں

ادھر جاتا ہے دیکھیں یا ادھر پروانہ آتا ہے

دغا شوخی شرارت بے حیائی فتنہ پردازی

تجھے کچھ اور بھی اے نرگس مستانہ آتا ہے

وہ نازک ہیں تو کیا اپنے سے خنجر پھر نہیں سکتا

تجھے کچھ ننگ بھی اے ہمت مردانہ آتا ہے

وہی جھگڑا ہے فرقت کا وہی قصہ ہے الفت کا

تجھے اے داغؔ کوئی اور بھی افسانہ آتا ہے