کوئی جانے تو کیا جانے وہ دکھتا ہے ہزاروں میں

کوئی جانے تو کیا جانے وہ دکھتا ہے ہزاروں میں

ستم گاروں میں عیاروں میں دل داروں میں یاروں میں

کوئی غنچہ دہن ہنس کر ہمیں اب کیا ہنسائے گا

بہاریں ہم نے لوٹی ہیں بہت اگلی بہاروں میں

دکھاؤ گے صف محشر میں ہم کتنے نکلتے ہیں

جو پوچھا اس نے ہے کوئی مرے امیدواروں میں

اجل کا نام لیں تقدیر کو روئیں مجھے کوسیں

مرے قاتل کا چرچا کیوں ہے میرے سوگواروں میں

جلانا داغؔ کا اچھا نہیں یہ دم غنیمت ہے

کہ ایسا با وفا اک آہ نکلے گا ہزاروں میں