مجھ سا نہ دے زمانہ کو پروردگار دل

مجھ سا نہ دے زمانہ کو پروردگار دل

آشفتہ دل فریفتہ دل بے قرار دل

پوچھا جو مجھ سے طالب روز جزا ہے کون

نکلا مری زبان سے بے اختیار دل

تاثیر عشق یہ ہے ترے عہد حسن میں

مٹی کا بھی بناؤں تو ہو بے قرار دل

پہلے پہل کی چاہ کا کیجئے نہ امتحاں

آنا تو سیکھ لے ابھی دو چار بار دل

بے تاب ہو کے بزم سے اس کے اٹھا دیا

غافل ہوں میں مگر ہے بہت ہوشیار دل

مشہور ہیں سکندر و جم کی نشانیاں

اے داغؔ چھوڑ جائیں گے ہم یادگار دل