دیکھ لیتے وہ ادھر بھی کبھی آتے جاتے

دیکھ لیتے وہ ادھر بھی کبھی آتے جاتے

خاک میں نیچی نگاہوں سے ملاتے جاتے

راہ میں اپنا بنایا تھا ہمارا مدفن

کوئی ٹھوکر تو لگا دیتے تم آتے جاتے

نامہ بر آ کے ہمیں زندہ نہ تو پائے گا

جان جائے گی ہماری ترے آتے جاتے

آرزو تھی کہ گزرتی کبھی یوں بھی کوئی رات

روٹھتے جاتے وہ ہم ان کو مناتے جاتے

جب یقیں آتا کہ سچے ہیں تمہارے وعدے

جھوٹی قسمیں تب وہ سر کی مری کھاتے جاتے

ہر گلے پر مجھے گالی کوئی دیتے شب وصل

کچھ مری سنتے کچھ آپ اپنی سناتے جاتے

میل ان شوخ نگاہوں سے جو تھا مد نظر

ہم سے بھی حضرت دل آنکھ ملاتے جاتے

اس کا کیا شکوہ کہ پہلو میں نہ ٹھہرے یہ جلال

دل ٹھہرنے کی کوئی شکل بتاتے جاتے