دور جب تک رہے ہم با دل ناشاد رہے

دور جب تک رہے ہم با دل ناشاد رہے

پاس ہم تختۂ مشق ستم ایجاد رہے

جو گزر جاتی ہے سر پر سے گزر جانے دے

اپنے لب پر نہ کبھی شکوۂ بیداد رہے

ربط باقی رہے محبوب و محب میں ہر دم

ہم ستم کش رہیں اور وہ ستم ایجاد رہے

میکدے سے ترے خالی نہ پھرا بادہ گسار

تو سلامت رہے اور مے کدہ آباد رہے

نہ ٹھکانہ ہے ہمارا نہ کوئی جائے قرار

عمر بھر راہ طلب میں تیری برباد رہے

ہوئی ہر ایک کی دو باتوں میں حل مشکل

تیری نسبت سے جہاں ہم رہے استاد رہے

دل کسی سے نہ لگا دست فشاں سب سے رہے

عمر بھر قید تعلق سے ہم آزاد رہے

جان دی حسرتؔ شیدا نے ترا لے کر نام

تجھ کو اس چاہنے والے کی بھی کچھ یاد رہے