yahi ek aarzu rahti hai bekal dil ki duniya mein

yahī ik aarzū rahtī hai bekal dil kī duniyā meñ

ki gum ho jā.ūñ 'ehsāñ' jalva-e-jān-e-tamnnā meñ

jahāñ ḳhauf-e-fanā kī tīrgī mafqūd hotī hai

jahāñ parvāz-e-fikr-e-shuq lā-mahdūd hotī hai

jahāñ hote nahīñ duniyā-e-ġham parvar ke nazzāre

jahāñ zarroñ ke dil meñ parvarish paate haiñ sayyāre

jahāñ chāroñ taraf tanvīr hī tanvīr hotī hai

'ibādat kī jahāñ bahjat fazā tafsīr hotī hai

jahāñ masrūf rahtī hai nazar ā.īna-bīnī meñ

jahāñ sūraj chamakte haiñ tabassum āfrīnī meñ

jahāñ pā-e-ḳhirad rahtā nahīñ zindāñ tā'at meñ

anal-haq hī anal-haq hai jahāñ bazm-e-samā’at meñ

jahāñ chhūtī nahīñ bād-e-fanā dāmān-e-hastī ko

jahāñ husn-parastish jānte haiñ ḳhud-parastī ko

jahāñ nāpaid bahr-e-be-niyāzī kā kināra hai

jahāñ taḳhlīq-e-'ālam ik taḳhayyul kā ishāra hai

jahāñ jhuktā hai sar zo'm-o-ġhurūr-e-āsmānī kā

ubaltā hai jahāñ shaffāf chashma zindagānī kā

vahīñ darbār hai us kunto kanzan kahne vaale kā

mirī āñkhoñ se ojhal mere dil meñ rahne vaale kā

yahi ek aarzu rahti hai bekal dil ki duniya mein

ki gum ho jaun 'ehsan' jalwa-e-jaan-e-tamnna mein

jahan KHauf-e-fana ki tirgi mafqud hoti hai

jahan parwaz-e-fikr-e-shuq la-mahdud hoti hai

jahan hote nahin duniya-e-gham parwar ke nazzare

jahan zarron ke dil mein parwarish pate hain sayyare

jahan chaaron taraf tanwir hi tanwir hoti hai

'ibaadat ki jahan bahjat faza tafsir hoti hai

jahan masruf rahti hai nazar aaina-bini mein

jahan suraj chamakte hain tabassum aafrini mein

jahan pa-e-KHirad rahta nahin zindan ta'at mein

anal-haq hi anal-haq hai jahan bazm-e-sama’at mein

jahan chhuti nahin baad-e-fana daman-e-hasti ko

jahan husn-parastish jaante hain KHud-parasti ko

jahan napaid bahr-e-be-niyazi ka kinara hai

jahan taKHliq-e-'alam ek taKHayyul ka ishaara hai

jahan jhukta hai sar zo'm-o-ghurur-e-asmani ka

ubalta hai jahan shaffaf chashma zindagani ka

wahin darbar hai us kunto kanzan kahne wale ka

meri aankhon se ojhal mere dil mein rahne wale ka