نہ تو ماہ بن کے فلک پہ رہ نہ تو پھول بن کے چمن میں آ

نہ تو ماہ بن کے فلک پہ رہ نہ تو پھول بن کے چمن میں آ

یہ تمام جلوے سمیٹ کر کسی دل گداز پھبن میں آ

ادب اے خیال خدا نما کہ فلک سے آنے لگی صدا

تجھے آرزوئے حیات ہے تو دیار دار و رسن میں آ

نہ جمال ہو نہ جلال ہو نہ جواب ہو نہ سوال ہو

جو الست و کن سے تھی پیشتر تو اسی ادائے کہن میں آ

مرا مدعائے نظر ہے تو میں تڑپ رہا ہوں کدھر ہے تو

مری کائنات خیال بن مرے ملک شعر و سخن میں آ

یہ بھی کوئی شان نمود ہے کہ خیال ہی میں وجود ہے

تو حجاب لالہ و گل میں بس تو لباس سرو و سمن میں آ

تری ذرہ ذرہ کو جستجو تری پتے پتے کو آرزو

کبھی پردہ ہائے جمال و بو سے نکل کے صحن‌ چمن میں آ