ایک خوش رو سے محبت ہو گئی

ایک خوش رو سے محبت ہو گئی

دل لگی کی اچھی صورت ہو گئی

لاکھ پردہ کیجیو ہوتا ہے کیا

آپ کی ظاہر حقیقت ہو گئی

عشق بازی میں یہ آزادی ملی

دین و دنیا سے فراغت ہو گئی

سنتے ہیں واعظ کہ مے خانہ میں آج

رہن دستار فضیلت ہو گئی

بت پرستی کی خدا کو چھوڑ کر

کیسی الٹی اپنی قسمت ہو گئی

ہم کو کیا خوش رو جہاں میں لاکھ ہوں

ہو گئی جس سے محبت ہو گئی

لگ گئی کس کی خدا جانے نظر

کیسی برہم اپنی صحبت ہو گئی

اس کا بحر غم سے بیڑا پار ہے

جس پہ وارثؔ کی عنایت ہو گئی

اب گلے مل جاؤ اوگھٹؔ پیار سے

ہو چکا شکوہ شکایت ہو گئی