تصورات میں جب تک تھی یار کی صورت

تصورات میں جب تک تھی یار کی صورت

خزاں کا دور بھی گزرا بہار کی صورت

جہاں میں کوئی بھی پرسان سوز غم نہ ہوا

کٹی ہے عمر چراغ مزار کی صورت

گیا ہے جب سے کوئی روٹھ کر مرے گھر سے

تڑپ رہا ہوں دل بے قرار کی صورت

ہر ایک دل میں تصور ہے حسن جاناں کا

ہر آئینے میں ہے آئینہ دار کی صورت

دکھانا چاند مجھے چاندنی خدا کے لیے

مری نگاہ میں پھرتی ہے یار کی صورت

ترے خیال میں حالت یہ ہو گئی اے دوست

کٹا ہے دن بھی شب انتظار کی صورت

بچھڑ گیا ہے فناؔ کون یہ گلے مل کر

دکھائی دیتی نہیں اب قرار کی صورت