دل بے قرار ہے مرے دل کو قرار دے

دل بے قرار ہے مرے دل کو قرار دے

اپنا بنا کے تو مری دنیا سنوار دے

کر دوں میں تیرے حسن پہ لاکھوں سحر نثار

تیرا پتا جو مجھ کو شبِ انتظار دے

کیوں چھانتا ہے کوچۂ دیر و حرم کی خاک

آ ان کے در پہ زندگی اپنی گزار دے

سر رکھ کے پائے ناز پہ سجدہ کروں تجھے

اتنا تو اے صنم! تو مجھے اختیار دے

پھیلا ہوا ہے دستِ طلب اب ترے حضور

مرضی ہے تیری پھول دے یا مجھ کو خار دے

اے دوست! مڑ کے دیکھ تو لے تو بھی کم سے کم

آواز جب کوئی تجھے دیوانہ وار دے

میرے صنم سے کہہ دے کوئی جا کے اے فناؔ

آ کے لحد میں میرا جنازہ اتار دے