آنکھ سے آنکھ ملاؤ تو کوئی بات بنے

آنکھ سے آنکھ ملاؤ تو کوئی بات بنے

رخ سے زلفوں کو ہٹاؤ تو کوئی بات بنے

تیر چھپ چھپ کے چلانے سے بھلا کیا حاصل

بے جھجھک سامنے آؤ تو کوئی بات بنے

سرمہ آنکھوں میں لگانے سے نہیں ہوتا سنگار

منہدی ہاتھوں سے لگاؤ تو کوئی بات بنے

جام بھر بھر کے تو ہم روز پیا کرتے ہیں

آج نظروں سے پلاؤ تو کوئی بات بنے

اے فناؔ جھوم کے آنے لگے کالے بادل

بزمِ میخانہ سجاؤ تو کوئی بات بنے