دل ہے بے خود سنبھالے نہ سنبھلے ہوش میں مجھ سے آیا نہ جائے

دل ہے بے خود سنبھالے نہ سنبھلے ہوش میں مجھ سے آیا نہ جائے

دیکھ لوں گر تری مست آنکھیں جام بھر کر اٹھایا نہ جائے

لاکھ دیکھے جتن ہم نے کر کے بات دل کی سمجھ میں نہ آئی

شہر اجڑے تو بس جائے پھر سے دل جو اجڑے بسایا نہ جائے

سرخ ہونٹوں کا انداز قاتل کر نہ ڈالے بہاروں کو بسمل

دیکھ لے گر تمہارا تبسم پھول سے مسکرایا نہ جائے

اپنے حالات کس کو بتاؤں زندگی ہے میری کشمکش میں

تیر نظروں کا ایسا لگا ہے زخم دل کا چھپایا نہ جائے

آپ کو ایسا دیکھا نظر نے بن گئے آپ نظروں کا حاصل

آپ سے دل کچھ ایسا لگا ہے اب کہیں دل لگایا نہ جائے

اے فناؔ میں نے اپنے لہو سے جس کی راہوں میں گلشن کھلائے

اس ستم گر سے دو پھول لے کر میری تربت پہ آیا نہ جائے