مری الفت اے میرے یار یہ رنگ لائی ہے

مری الفت اے میرے یار یہ رنگ لائی ہے

دل کے شیشے میں تیری شکل اتر آئی ہے

اے کرم ساز ازل چشم چراغ حیدر

ترے دم سے ہی میرے دم میں توانائی ہے

تیرا دیدار ہے دیدار الٰہی مجھ میں

بندگی میری ترے در کی جبیں سائی ہے

تیرا در چھوڑ کے جاؤں تو کہاں جاؤں میں

راحت دل ترے قدموں میں نظر آئی ہے

بھر دے بھر دے مرے داتا مری جھولی بھر دے

تشنہ جانا ترے در سے تری رسوائی ہے

اے سخی ابن سخی آل نبی ابن علی

ہو غلاموں پہ کرم وقت مسیحائی ہے

گلشن حضرت بیدم کا وہ گل ہوں میں فرازؔ

جس کی بو میں شہ بیدم کی لہک آئی ہے