کبھی کعبے میں پاتا ہوں کبھی بت خانے کے اندر

کبھی کعبے میں پاتا ہوں کبھی بت خانے کے اندر

لگا کے تجھ سے دل پھرتا ہوں مارا مارا میں در در

یہ کیسا پریت ہے الفت ہے ظالم پیار ہے کیسا

کہ دل سی چیز لے کر جا بجا لگواتے ہو چکر

خود ہی تو جلوے دکھلا کر قرار و صبر لوٹا ہے

خود ہی کہہ کہہ کے دیوانہ بھی ہنستے جاتے ہو مجھ پر

شراب بے خودی ہے یا مری جاں حسن ہے تیرا

ہوا بے ہوش و بے خود پڑ گئی جس کی نظر تجھ پر

ہم ہی تنہا نہیں شیدا ترا عالم کا عالم ہے

فدا کچھ صورت یکتا پہ اور کچھ حسن زیبا پر

میں صدقے حسن پر تیرے فدا ان نیچی نظروں پر

جو لاکھوں کے حواس و ہوش لے لے پردے میں رہ کر

میں دیوانہ تو ہوں لیکن فرازؔ اس کا دوانہ ہوں

حسینوں کا جو سلطاں ہے پری زادوں کا ہے افسر