عالم صورت کا چھپ جانا عیاں ہو جائے گا

عالم صورت کا چھپ جانا عیاں ہو جائے گا

یہ مرقع اک دن آنکھوں سے نہاں ہو جائے گا

دود دل میرا نہ چشم کم سے دیکھ اے رشک مہ

پہن ہو گا یہ اگر تو آسماں ہو جائے گا

آہ مجھ سے نالہ کش کی ہوگی مدفن جو زمیں

اس زمیں کا قطعہ سارا نیستاں ہو جائے گا

مت جلا دل کو مرے ہر دم کہ یہ ابر مژہ

اب جو ہے یوں آب ریز آتش فشاں ہو جائے گا

باز گشت عمر رفتہ کا سبب ہے شرب مے

زاہد اس کو پی کہ پھر تو بھی جواں ہو جائے گا

مت سنو غیروں کے واں ہر شب تم افسانے طویل

ورنہ اک دن قصہ ہی کوتاہ یاں ہو جائے گا

پائے گا اس بے نشاں کا کچھ تو اے راسخؔ نشاں

آپ کو کہہ کر جو بے نام و نشاں ہو جائے گا