تری میعاد غم پوری ہوئی اے زندگی خوش ہو

تری میعاد غم پوری ہوئی اے زندگی خوش ہو

قفس ٹوٹے نہ ٹوٹے میں تجھے آزاد کرتا ہوں

میں اپنے دل کا مالک ہوں مرا دل ایک بستی ہے

کبھی آباد کرتا ہوں کبھی برباد کرتا ہوں

ملاقاتیں بھی ہوتی ہیں ملاقاتوں کے بعد اکثر

وہ مجھ کو بھول جاتے ہیں میں ان کو یاد کرتا ہوں

خودی کی ابتدا یہ تھی کہ اپنے آپ میں گم تھا

خودی کی انتہا یہ ہے خدا کو یاد کرتا ہوں

جفا کارو مری مظلوم خاموشی پہ سنتے ہو

ٹھہر جاؤ ذرا دم لو ابھی فریاد کرتا ہوں

بتوں کے عشق میں کھویا گیا ہوں ورنہ اے اخترؔ

خدا شاہد ہے میں اکثر خدا کو یاد کرتا ہوں