chhele banke yar pe mora jiya luTa jae hai

chhele bāñke yaar pe morā jiyā luuTā jaa.e hai

tan-man vārūñ us pe apnā jī meñ ye hī aa.e hai

nain kaTārī chamkā.e aur tiir palak dikhlā.e hai

baal kī laT kaalī nāgin jhapaT ke kaaTe khaa.e hai

bāñkī chhab aur tirchhī chitvan chaal qayāmat Dhaa.e hai

qahr-e-ḳhudā andāz-e-kamar hai baat meñ sau bal khaa.e

piit kī aag bhaḌak ga.ī ghaT meñ tan-man sulgā jaaye hai

bastī hī meñ jī lagtā aur jangal hī na suhā.e hai

hijr kī taab nahīñ hai mohan vasl se ab inkār na kar

apne chāhne vaale ko koī itnā bhī tarsā.e hai

maanā ham ne ye ki hasīñ haiñ ek se behtar ek bahut

lekin ek vahī sāñvaliyā hamre man kā bhaa.e bhaa.e hai

marne ko tayār huuñ maiñ bismillāh kar zab.h mujhe

bāñke chhele yaar agar tū teġh-e-jafā chamkā.e hai

'bismil' ḳhuub samajhte haiñ ham ki tum un par marte ho

lekin vo bhī tum se hālat laag kabhī jatlā.e hai

chhele banke yar pe mora jiya luTa jae hai

tan-man warun us pe apna ji mein ye hi aae hai

nain kaTari chamkae aur tir palak dikhlae hai

baal ki laT kali nagin jhapaT ke kaTe khae hai

banki chhab aur tirchhi chitwan chaal qayamat Dhae hai

qahr-e-KHuda andaz-e-kamar hai baat mein sau bal khae

pit ki aag bhaDak gai ghaT mein tan-man sulga jaye hai

basti hi mein ji lagta aur jangal hi na suhae hai

hijr ki tab nahin hai mohan wasl se ab inkar na kar

apne chahne wale ko koi itna bhi tarsae hai

mana hum ne ye ki hasin hain ek se behtar ek bahut

lekin ek wahi sanwaliya hamre man ka bhae bhae hai

marne ko tayar hun main bismillah kar zabh mujhe

banke chhele yar agar tu tegh-e-jafa chamkae hai

'bismil' KHub samajhte hain hum ki tum un par marte ho

lekin wo bhi tum se haalat lag kabhi jatlae hai