کر غور ذرا دل میں کچھ جلوہ گری ہوگی

کر غور ذرا دل میں کچھ جلوہ گری ہوگی

یہ شیشہ نہیں خالی دیکھ اس میں پری ہوگی

انساں کو کہو کس کی صورت یہ کیا پیدا

کیا علم الہٰی میں شکل بشری ہوگی

ہم کھول کے حال اپنا پچھتائے بہت دل میں

معلوم نہ تھا اتنی یاں بے قدری ہوگی

ہم اس کو ہی سمجھیں گے شاخ شجر الفت

جو آب سے سوکھے گی آتش سے ہری ہوگی

ساقی ترا مستی سے کیا حال ہوا ہوگا

جب تو نے یہ مے ظالم شیشہ میں بھری ہوگی

اے علویؔ بتوں کی ہے کچھ دل شکنی عادت

ان سنگ دلوں سے کب آئینہ گری ہوگی