عشق کی آمد ہے دل میں اضطراب آنے کو ہے

عشق کی آمد ہے دل میں اضطراب آنے کو ہے

خانہ ویرانی کو اک خانۂ خراب آنے کو ہے

وقت اظہار عمل رکھنا لحاظ کاتبین

روبرو اک روز یہ فرد حساب آنے کو ہے

لے وہ ساقی آ رہا ہے اے دل اب باتیں ہیں کیوں

بزم میں تم تک بھی اب دور شراب آنے کو ہے

آمد آمد عشق کی ہے درد دل پیدا ہوا

گڑ چکا خیمہ سواری جناب آنے کو ہے

جو گنہ کرتے ہیں کر لیجئے در توبہ ہے باز

پھر نہ ہو افسوس وقت سد باب آنے کو ہے

ہورہا ہے علوؔیا کیا شرح صدر مشت خاک

کاروان فیض شاہ بو تراب آنے کو ہے