فرقت میں ایک درد مرا ہم نشیں رہا

فرقت میں ایک درد مرا ہم نشیں رہا

اٹھ بھی کھڑا ہوا تو یہیں کا یہیں رہا

اس بت نے ایک سجدہ نہ میرا کیا قبول

ٹیکا کلنگ کا مجھے داغ جبیں رہا

دل سے نکل گئی کوئی حسرت کہ تن سے جاں

دیکھیں تو کون پیش دم واپسیں رہا

اٹھے جو بزم یار سے تنہا ہم آئے گھر

طاقت کہیں حواس کہیں دل کہیں رہا

غصے میں حسن یار کو سوجھی نئی نئی

گہہ ابروؤں پہ بل کبھی چیں بر جبیں رہا

جا لپٹا خاک ہو کے بھی دامن سے یار کے

کوئے وفا میں چال کوئی میں نہیں رہا

دل لے کے مجھ سے یار نے یوں کہہ دیا جلالؔ

دونوں جہاں میں اس کا ٹھکانا نہیں رہا