حجاب آتا ہے ان سے نظر ملانے میں

حجاب آتا ہے ان سے نظر ملانے میں

عجیب لطف ہے وعدوں کے بھول جانے میں

ابھی تو آؤ ٹھہر ذرا چلے جانا

لگے گی دیر ذرا حال دل سنانے میں

ملے نہ پھول تو تربت پہ مسکرا دینا

سنا ہے پھول برستے ہیں مسکرانے میں

ابھی بچھائے تھے تنکے کہ گر پڑی بجلی

بنانا تھا کہ لگی آگ آشیانے میں

کبھی تو میری محبت کا یقیں کر لو

کہیں نہ عمر گزر جائے آزمانے میں

جلیلؔ دل کی لگی کا علاج ہو نہ سکا

میں اپنا داغ دکھاتا پھرا زمانے میں