دلا اب ان کو مرا کچھ خیال ہے کہ نہیں

دلا اب ان کو مرا کچھ خیال ہے کہ نہیں

جو پوچھتے ہیں طبیعت بحال ہے کہ نہیں

بڑھا کے زلف الجھتی ہو تم نہ کہتے تھے

تمہیں کہو یہ بلا اب وبال ہے کہ نہیں

کل آتے آتے مرے گھر گئے رقیب کے پاس

حضور آپ ہی کہہ دیں یہ چال ہے کہ نہیں

جو منطقی کوئی ملتا تو پوچھتے یہ بات

دہان یار میں کچھ قیل و قال ہے کہ نہیں

کسی سے بات تمہیں اے بتوں نہ کرنی تھی

کہو برائے خدا یہ کمال ہے کہ نہیں

خراب دونوں جہاں میں ہے مبتلا اس کا

خدا کا قہر بتوں کا جمال ہے کہ نہیں

رقیب لے لب لعلین یار کا بوسہ

یہ بات قابل رنج و ملال ہے کہ نہیں

جو خوش خرام حسین گالیاں سناتے ہیں

اب ان سے جوش حزیں بول چال ہے کہ نہیں