دم میں جب تک دم رہے

دم میں جب تک دم رہے

زندگی جیسی بھی ہو جو کچھ رہے

دم بھرے جائیں گے تیرا

دم میں جب تک دم رہے

داغ دل زخم جگر سے اور کچھ مطلب نہیں

بات صرف اتنی ہے کوئی یادگار غم رہے

کس نے محسوسات کی دنیا کو بخشی آگہی

چاہنے والوں میں پہلے تم رہے یا ہم رہے

دیدۂ تر اک علامت ہے حیات عشق کی

دل میں خود دھڑکن رہے گی چشم جب تک نم رہے

اس حسیں الجھن سے سو سو حسن پیدا کیوں نہ ہو

زلف کی ہر برہمی پر جب کوئی برہم رہے

بن گئی خود آفت جاں اپنی گوناگونیا

عشق ہو یا حسن ہر پردے کے پیچھے ہم رہے

میری پہلی پرورش تقدیس کی آغوش میں

قدسیوں کے سر بھی کاملؔ میرے آگے خم رہے