کون سا گھر ہے کہ اے جاں نہیں کاشانہ ترا اور جلوہ خانہ ترا

کون سا گھر ہے کہ اے جاں نہیں کاشانہ ترا اور جلوہ خانہ ترا

مے کدہ تیرا ہے کعبہ ترا بت خانہ ترا سب ہے جانانہ ترا

تو کسی شکل میں ہو میں ترا شیدائی ہوں تیرا سودائی ہوں

تو اگر شمع ہے اے دوست میں پروانہ ترا یعنی دیوانہ ترا

مجھ کو بھی جام کوئی پیر خرابات ملے تیری خیرات ملے

تا قیامت یوں ہی جاری رہے پیمانہ ترا رہے مے خانہ ترا

تیرے دروازے پہ حاضر ہے ترے در کا فقیر اے امیروں کے امیر

مجھ پہ بھی ہو کبھی الطاف کریمانہ ترا لطف شاہانہ ترا

صدقہ مے خانے کا ساقی مجھے بے ہوشی دے خود فراموشی دے

یوں تو سب کہتے ہیں بیدمؔ ترا مستانہ ترا اب ہوں دیوانہ ترا