کون سا گل ہے نہیں جو زیب دامان بہار

کون سا گل ہے نہیں جو زیب دامان بہار

کون سا غنچہ نہیں گوئے گریبان بہار

کس قدر روشن ہے پہلو سے شبستان بہار

شاخ ہر گلبن کی ہے سرو چراغان بہار

قاضی و مفتی و زاہد سب گھروں میں چھپ رہے

ایک دیوانہ ہے تیرا مرد میدان بہار

نشے کے ڈورے جو ہیں اے مست آنکھوں میں تری

ہے بجا ان کو اگر کہیے رگ جان بہار

دونوں عاشق ہیں مگر ہے عشق میں البتہ فرق

میں نثار حسن ہوں بلبل ہے قربان بہار

تازگی ہر رخ پہ ہے جاتی رہی افسردگی

پتے پتے بوٹے بوٹے پر ہے احسان بہار

مے فروشوں سے کہو کھینچیں وہ انگوری شراب

کونپلیں پھوٹیں ہوا گلشن میں سامان بہار

باغباں کانٹوں کو سکھلا رکھ کہ ہنگام خزاں

کوچ میں ڈالیں خلل الجھائیں دامان بہار

کیوں نہ کہتے شاہ پتے تاج ہیں شاخیں ہیں تخت

ہے نگیں لالہ تو نا فرماں ہے فرمان بہار

برگ گل سے قطرۂ شبنم گراتی ہے صبا

کیوں نہ لوٹے دل جو دیکھے در غلطان بہار

جوش گل سے ہے یہ ارزاں نرخ بازار اے امیرؔ

کوڑی کوڑی بک رہے ہیں ماہ کنعان بہار