نہ حکایت غم عشق ہے نہ حدیث ساغر و جام ہے

نہ حکایت غم عشق ہے نہ حدیث ساغر و جام ہے

ترا مے کدہ ہے وہ مے کدہ جہاں لفظ ہوش حرام ہے

مجھے اتنا ساقی بتا ذرا کہ حلال ہے یا حرام ہے

مرے ہاتھ میں ترا جام ہے مرے لب پہ تیرا ہی نام ہے

نہ اسیر قید سجود میں نہ رہین جور وجود میں

کہ یہ عاشقوں کی نماز ہے نہ سجود ہے نہ قیام ہے

تری بارگاہ کی بات ہے تری بارگاہ کا ذکر کیا

جو امام ہے وہ ہے مقتدی جو ہے مقتدی وہ امام ہے

وہ ہجوم ماہ و شاں بڑھا یہ ہجوم سوختہ جاں جلا

کہیں عشق صرف وجود ہے کہیں حسن محو خرام ہے

تری بزم ناز کی گرد ہے یہ تمام وقعت زندگی

یہاں ذکر شان ایاز کیا یہاں غزنوی بھی غلام ہے

جو نگاہ دوست نہ چھو سکے وہ نظر تو کوئی نظر نہیں

جو نگاہ دوست نہ چھو سکے وہ نظر جنوں پہ حرام ہے

تو جہاں جہاں بھی ہے جلوہ گر ہے وہیں وہیں پہ مری نظر

ترے حسن کی ہیں وہ رفعتیں مرے عشق کا یہ مقام ہے

انہی صبح و شام کے فیض سے مجھے دولت غم دل ملی

تری زلف رخ بھی عجیب ہے کبھی صبح ہے کبھی شام ہے

نہیں تاب کوثر عارفیؔ کوئی ساغر مے کوثری

یہ دیار لالہ رخاں نہیں یہ قلندروں کا مقام ہے