جنوں ميں ساتھ ہمارا دیا دیا نہ دیا

جنوں ميں ساتھ ہمارا دیا دیا نہ دیا

کچھ اعتبار کسی نے کیا کیا نہ کیا

رہا ہوں مجلس ساقی میں، جام کا کیا ہے

ملا ملا نہ ملا پھر پیا پیا نہ پیا

ہمارے سر پہ ہی الزام عاشقی کا رہا

یہ بار غیر نے سر پر لیا لیا نہ لیا

کتاب شوق نظر سے جنہیں پڑھائی گئی

انہوں نے رخ سوئے مکتب کیا کیا نہ کیا

نہیں ہے دشت جنوں میں کسی کو عار اس سے

بلا سے چاک گریباں سیا سیا نہ سیا

ہیں بے نیاز ذم و مدح تیرے سودائی

کسی نے اب کوئی طعنہ دیا دیا نہ دیا

وہ بیکسی ہے کہ وحشت کے ناگ ڈستے ہیں

غریب ایسے میں کوئی جیا جیا نہ جیا

مری غزل سے ہیں سکتے میں اہل فکر و نظر

بلند نعرۂ تحسیں کیا کیا نہ کیا

بہر طریق یہاں جان دینی پڑتی ہے

خوشی سے زہر کسی نے پیا پیا نہ پیا

یہ میکدہ ہے، یہاں میکشوں کی بھیڑ رہے

کسی نے ہاتھ میں ساغر لیا لیا نہ لیا

اب آگے اس کے مقدر کی بات ہے رومیؔ

کوئی اب ان کے بھروسے جیا جیا نہ جیا