وہ مست ناز آتا ہے ذرا ہشیار ہو جانا

وہ مست ناز آتا ہے ذرا ہشیار ہو جانا

یہیں دیکھا گیا ہے بے پیے سرشار ہو جانا

ہمارا شغل ہے راتوں کو رونا یاد دلبر میں

ہماری نیند ہے محو خیال یار ہو جانا

تصور کی مرے گل کاریاں صیاد کیا جانے

قفس کا بھی گلوں کی یاد میں گلزار ہو جانا

لگاوٹ سے تری کیا دل کھلے معلوم ہے ہم کو

ذرا سی بات میں کھنچ کر ترا تلوار ہو جانا

عبث ہے جستجو بحر محبت کے کنارے کی

بس اس میں ڈوب مرنا ہی ہے اے دل پار ہو جانا

نہیں درکار مے ہم کو پئے جا تو ہی اے ساقی

ہمیں تو مست کرتا ہے ترا سرشار ہو جانا

خبر کیا تھی کہ اس انکار میں اقرار پنہاں ہے

مرا غش کھا کے گر پڑنا کہ بس دیدار ہو جانا