کسی سے سیکھ لے بلبل سراپا داستاں رہنا

کسی سے سیکھ لے بلبل سراپا داستاں رہنا

ہے ننگ عشق حال دل کا محتاج بیاں رہنا

یہ کیا طرفہ ادا طرفہ تماشا طرفہ پردا ہے

مری آنکھوں میں پھرنا پھر بھی آنکھوں سے نہاں رہنا

خلاصہ ہم سے سن لے کوئی آداب محبت کا

دعائیں دل میں دینا ظلم سہنا بے زباں رہنا

یہی آتا ہے بس یا اور بھی کچھ تم کو آتا ہے

امیدیں توڑنا دل خون کرنا بد گماں رہنا

بھروسہ کچھ نہیں اس نفس امارہ کا اے زاہد

فرشتہ بھی یہ ہو جائے تو اس سے بد گماں رہنا

نہ رہ ناشاد سالک مسلک مجذوبؔ پر آ جا

اگر ہر حال میں تو چاہتا ہے شادماں رہنا