دشنام دے ہے غیر کو تو جان کر مجھے

دشنام دے ہے غیر کو تو جان کر مجھے

پیارے یہ لطف کیجیے پہچان کر مجھے

کل کی طرح سے آج بھی اب نیند آ چکی

گھیرا اسی خرابی نے پھر آن کر مجھے

کہتا ہے ایک نگاہ پہ آئینہ رو مرا

بس اور اب زیادہ نہ حیران کر مجھے

آنا بہ بندہ خانہ اگر تجھ کو عار ہے

دولت سرا میں اپنی ہی مہمان کر مجھے

ہوں رو بروئے چشم تو میں سرمہ در گلو

پر کہیو زلف سے نہ پریشان کر مجھے

صدقے ترے میں کب تئیں تڑپا کروں عبث

ہے روز عید آج تو قربان کر مجھے

ہیں شعر فہم جتنے زمانے میں لا علاج

اے دردؔ مانتے ہیں یہ سب مان کر مجھے