دونوں جہاں کو روشن کرتا ہے نور تیرا

دونوں جہاں کو روشن کرتا ہے نور تیرا

عیاں ہیں مظاہر ظاہر ظہور تیرا

یاں افتقار کا تو امکاں سبب ہوا ہے

ہیں ہوں نہ ہوں ولے ہے ہونا ضرور تیرا

باہر نہ آ سکی تو قید خودی سے اپنی

اے عقل بے حقیقت دیکھا شعور تیرا

ہے جلوہ گاہ تیرا کیا غیب کیا شہادت

یاں بھی شہود تیرا واں بھی حضور تیرا

جھکتا نہیں ہمارا دل تو کسی طرف یاں

جی میں بھرا ہوا ہے از بس غرور تیرا

اے دردؔ منبسط ہے ہر سو کمال اس کا

نقصان گر تو دیکھے تو ہے قصور تیرا