گر دیکھیے تو مظہر آثار بقا ہوں

گر دیکھیے تو مظہر آثار بقا ہوں

اور سمجھئے جوں عکس مجھے محو فنا ہوں

کرتا ہوں پس از مرگ بھی حل مشکل عالم

بے حس ہوں پہ ناخن کی طرح عقدہ کشا ہوں

ممنون مرے فیض سے سب اہل نظر ہیں

جوں نور ہر اک چشم کا دیدار نما ہوں

ہے آستر فقر اگر سمجھو تو شاہی

سلطاں ہے اگر شاہ تو میں ظل ہما ہوں

احوال دو عالم ہے مرے دل پہ ہویدا

سمجھا نہیں تا حال پر اپنی تئیں کیا ہوں

آواز نہیں قید میں زنجیر کی ہرگز

ہر چند کہ عالم میں ہوں عالم سے جدا ہوں

ہوں قافلہ سالار طریق قدما دردؔ

جوں نقش قدم خلق کو میں راہنما ہوں