کعبۂ ابرو دکھا او بت خدا کے واسطے

کعبۂ ابرو دکھا او بت خدا کے واسطے

شکل مژگاں ہاتھ اٹھائے ہوں دعا کے واسطے

دست گیروں کا نہ احساں ضعف نے ہونے دیا

ہاتھ اٹھ سکتا نہیں میرا عصا کے واسطے

جو کہ قانع ہو وہ بچ جائے فریب نفس سے

دام کب صیاد پھیلائے ہما کے واسطے

سچ تو یہ ہے آدمی سا کوئی خود مطلب نہیں

کی عبادت بھی تو حور مہ لقا کے واسطے

اشک خونی سے ہے گلگوں رخت عریانی وزیرؔ

رو رہا ہوں اک گل رنگیں قبا کے واسطے